Yay aylarında həddən artıq günəş şüalarına məruz qalmaq dəridə ləkələrin və çillərin yaranmasına səbəb olur. Bunlardan xilas olmaq üçün ən uyğun vaxt payızdır. Üstəlik, bahalı proseduralara ehtiyac yoxdur. Evdə hazırlanan maskalarla bu işin öhdəsindən gəlmək olar.

Çil və ləkələrə qarşı ən təsirli maskaları təqdim edirik:

Pomidor dərinin təbii rəngini bərpa edir, ləkələri təmizləyir. Ona görə də,, pomidordan cürbəcür maskalar hazırlamaq mümkündür:

Unlu pomidor maskası

1 ədəd pomidorun qabığını soyub blenderdən keçirin. Çay süzgəcindən süzün. Əldə etdiyiniz pomidor suyuna bir az un əlavə edib yaxşıca qarışdırın və məcun halına salın. Bu qarışığı göz və doqdaqların ətrafı istisna olmaqla, bütün üzə çəkin və masaj edin. 10 dəqiqə gözlədikdən sonra maskanı ilıq su ilə təmizləyin.

Ballı pomidor maskası

Tərkibi:

1 dənə pomidor

1 çay qaşığı bal

1 çay qaşığı saf zeytun yağı

Pomidoru soyub rəndələyin. İçərisinə digər məhsulları əlavə edib qarışdırın. Üzünüzə çəkib 15 dəqiqə saxlayın. Daha sonra ilıq su ilə təmizləyin.

Qatıqlı pomidor maskası

Tərkibi:

1 dənə pomidor

2 xörək qaşığı qatıq

1 çay qaşığı badam yağı

Pomidoru soyub rəndədən keçirin və digər məhsullarla qarışdırın. Maskanı çəkib üzünüzü dairəvi hərəkətlərlə masaj edin. 20 dəqiqə gözləyib isti su ilə təmizləyin.